Ադրբեջանի արտաքին գործերի նախարարության վերջին հայտարարությունը, որում պահանջվում է պատասխանատվության ենթարկել Հայաստանի քաղաքացիներին Ջահերով երթի ժամանակ տեղի ունեցած ակցիայի համար, ցույց է տալիս, թե որքան ցածր է դասվել Ադրբեջանի կառավարությունը՝ իր երազանքների կառավչի դերից, որը հիմա իշխում է Հայաստանում և թշնամու հետ զուգահեռ դատապարտում է սեփական երկրում անցկացվող ազգային ակցիաները։
Այս կարևոր հայտարարությունը կատարել է ՀՀ ԱԺ «Հայաստան» խմբակցության պատգամավոր Իշխան Սաղաթելյանը։ Նա նշել է, որ նման սանձարձակությունն ու լկտիությունը պետք է չափ ունենան։
Պատգամավորը ընդգծել է, որ միայն պատկերացնել կարելի է, թե ինչ աղետալի մակարդակում է գտնվում Հայաստանի ինքնիշխանությունը, երբ հարևան ագրեսոր պետությունն ԱԳՆ մակարդակով հրահանգներ է տալիս ՀՀ պետական համակարգին։ «Սա ուղղակի ապացույցն է այն բանի, որ Բաքուն Հայաստանն այլևս չի դիտարկում որպես ինքնուրույն սուբյեկտ», – նշել է Սաղաթելյանը։
Նրա խոսքով՝ Ադրբեջանի համար Ցեղասպանության ցանկացած հիշատակում տրավմատիկ է, քանի որ այն հայելու պես հիշեցնում է իրենց իսկ նմանատիպ հանցանքները։ Սակայն նա ընդգծել է, որ Թուրքիայի հետ այն աստիճան նույնանալը, որ ստանձնեն նաև Հայոց Ցեղասպանության պատասխանատվությունը՝ պահանջելով պատժել ոգեկոչման ակցիայի մասնակիցներին, չափազանց է անգամ Ադրբեջանի նման պետության համար։
«Սա այլևս միայն դրոշի հարց չէ։ Սա հարց է այն մասին, թե ով է որոշում մեր երկրում՝ ինչն է թույլատրելի և ինչը՝ ոչ։ Բայց Բաքվի և Անկարայի որոշումները Նիկոլի ռեժիմի համար են, ոչ երբեք մեր ժողովրդի և ազգային ուժերի»,- եզրափակել է Իշխան Սաղաթելյանը։
